Алматы мектептерінде сейсмикалық төзімділік жұмыстары жүргізілуде

АЛМАТЫ. ҚазАқпарат – Алматыда жаңа мектептер салынып, кейбір ескі білім беру ұйымында сейсмикалық төзімділік жұмыстары жүріп жатыр. Бұл туралы қалалық білім басқармасының басшысы Ләззат Жылқыбаева мәлім етті, деп хабарлайды ҚазАқпарат тілшісі.

Оның айтуынша, қазір Алатау, Наурызбай және Түрксіб аудандарында 12 600 орындық 8 мемлекеттік мектепте және 17 жұмыс істеп тұрған мектепке 8 263 орындық қосымша құрылыс салынып жатыр. Атап айтсақ бұл №38, 60, 166, 186, 6, 132, 117, 133, 144, 121, 199, 191, 57, 177, 102, 34, 170-ші мектеп.

«4 150 орындық 9 қосымшаның құрылысын оқу жылының басында аяқтау, ал қалған 8 қосымшаның құрылысын осы жылдың соңына дейін аяқтау жоспарланған. Сондай-ақ, 4 мектептің ғимаратына қалпына келтіру және күрделі жөндеу жұмыстары жүргізілуде, ол №7, 40, 45, 54 мектеп. № 81 мектептің сейсмотұрақтылығын күшейту аяқталды, тағы №40, 45, 54-ші мектептің құрылысын 1 қыркүйекке дейін және № 7 мектептің құрылыс-монтаж осы ағымдағы жылдың желтоқсан айында аяқтау жоспарлануда»,-деді басқарма басшысы.

Сонымен қатар, ол қазір №4 мектепті реконструкциялау, 2 мектепке қосымша құрылыс салу және 3 мектепті сейсмикалық күшейту бойынша жұмыстар басталғанын айтты.

Жөндеу жұмыстары кезінде мектептерді көшіру жұмыстары жүргізілуде.