«Шамамыз келгенше суды көшеге қарай бұрып жібердік. Бүгін екі трактор келіп, шамасы жетпей жатыр. Фундаменттің астына қарай су сіңіп кетті. Қорадағы мал лайдың астында қалды», - дейді Айдарлы ауылының тұрғыны.
Тұрғындар ағысы қатты су үйдің маңындағы қоршауларды қиратып, үйдің кіреберісіне де су кіргенін айтады. Сөздерінше, еккен бау-бақшалары жарамсыз болып қалған. Су қыста азық-түлік сақтайтын жертөлеге де жайылған екен.
«29 мамыр күні сағат 10:00 шамасында Жамбыл ауданының Айдарлы ауылында егін алқаптарын суғару үшін Үлкен Алматы каналы арқылы су жіберу нәтижесінде Бауыржан Момышұлы көшесіндегі №7, №25 үйдің ауласын су алды. Төтенше жағдайлар күшімен сағат 16:30 шамасында ауладағы су толығымен сорғызылды, қазіргі уақытта су алған аулалар жоқ. Қазір каналдың жағасын бекіту жұмыстары жүргізіліп жатыр», - деді Алматы облыстық ТЖД Төтенше жағдайларды жою бөлімінің инженері Бауыржан Ибраимов.