«Алматы-Ыстықкөл» автомобиль жолының ең қолайлы бағыты анықталды
Қазақстан Республикасының Президенті өзінің Қырғызстан Республикасына барған іс-сапары барысында, «Алматы-Ыстықкөл» автомобиль жолының құрылысы жөнінде шешім қабылдаған болатын.
Аталған тапсырманы орындау аясында, «ҚТЖ» ҰК» АҚ Президенті А. Мамин Қырғызстан Республикасы Көлік және коммуникация министрі А. Малабаевпен кездесу өткізді. Оның нәтижесінде, аталған жобаны жүзеге асыруға арналған бірлескен іс-шаралар жоспары әзірленді. «ҚазАвтоЖол» ҰК» АҚ, Қырғызстан Республикасының Көлік және коммуникация министрлігі және жобалау ұйымдары өкілдерінің қатысуымен екіжақты жұмыс тобы құрылып, болашақ тас жолға алғаш тексеру жүргізілді. Тексеру қорытындысы бойынша бағыттың ең қолайлы жолы анықталды, ол «Алматы-Ұзынағаш-Қастек-Қарасай батыр-Ыстықкөл» бағыты бойынша жүретін болады. Қазақстан аумағы бойынша Ұзынағаштан Қастек ауылына дейінгі 42 шақырымды құрайтын бұрын болған жолды қайта жөндеуден өткізу жоспарланған. Бұдан әрі ұзындығы 47 шақырым болатын жаңа жол құрылысы қажет.
Жоспарланған жол теңізден 2 640 метр жоғары орналасқан, төңірек бедері қиын, серпантин бойынша шұғыл өрден өтетін Жаңа Қастек асуы арқылы өтетін болады. Асудан жүріп өткеннен кейін бағыт Еңбек және Қарасай батыр (бұрыңғы Михайловка ауылы) шекаралық ауылдары арасымен өтетін болады. Ол жерлерде 5 мыңға жуық адам тұрады.
Тау жолы бойында жолды 18 рет кесіп өтетін бұлақ ағып жатқандығын айта кеткен жөн. Бұл жобаны жүзеге асыру барысында, жердің бедерінде көптеген жартастар болғандықтан, бұрғылап жару жұмыстарын атқару және тіреп тұратын дуалдарды орнату қажет болады.
Қырғызстан тарапына да сондай-ақ, 1 шақырым жол және Шу өзені арқылы көпір салу қажет.
Жалпы алғанда, Алматы-Ыстықкөл жаңа бағыты бұрын болған 480 шақырым жолдың орнына 280 шақырымды құрайтын болады. Аталған бағытты таңдау Еңбек және Қарасай батыр ауылдарын Алматы қаласымен байланыстыруға мүмкіндік береді, ол аталған өңірдің дамуына оң ықпал етеді. «Алматы-Ыстықкөл» жаңа жол құрылысы туризмнің өркендеуіне әсер етеді, елдер арасындағы транзит әлеуетін арттыруға септігін тигізеді, сондай-ақ, жағымды әлеуметтік-экономикалық күш беріп, аталған бағыттың бойында орналасқан елді-мекендердің дамуына мультипликативтік әсер береді.
Бұдан бұрын хабарлағанымыздай, ағымдағы жылдың 12 тамызында Еуразиялық экономикалық одағы туралы шартқа Қырғыз Республикасының қосылғандығы туралы шарт күшіне енді. Қырғызстан енді Армения, Беларусь, Қазақстан және Ресей сияқты одақтың толыққанды мүшесі болды.