Алматыда әлеуметтік тақырыпқа қалам тартып жүрген жастар марапатталды
Ұйымдастырушылар оларды арнайы диплом мен сандық фотокамералар табыс етті. Бұл құрметке «Әлеуметтік проза» аталымы бойынша «Бақыт кілті» деген мақаласы үшін Меруерт Ілиясова, «Әлеуметтік кеңес» аталымы бойынша «Ошибка ценою здоровья» мақаласы үшін Юлия Семилякова, «Әлеуметтік лирика» аталымы бойынша «Я плагиата не приемлю...» өлеңдер топтамасы үшін Александр Стрельников ие болды.
«Халық банкі үшін әлеуметтік мәселелер тақырыбы етене жақын. Біз бүкіл Қазақстан бойынша өз қамқорлығындағы балалар мекемелерінің тәрбиеленушілеріне білім беру, шығармашылық өнерлерін, сондай-ақ дене шынықтыру мен спортты дамыту бағытындағы бірқатар әлеуметтік жобаларды қолға алып, жүзеге асырудамыз. Әйтсе де, бүгінгі марапаттың мәні ерекше деуге болады. Біздің мақсатымыз - жас қаламгерлердің қоғамдағы әлеуметтік мәселелерге қызығушылығын арттыру», дейді банктің Басқарма төрағасының орынбасары Станислав Кособоков. Ал «Қазақстан Журналистер одағы» қоғамдық бірлестігі басқармасының төрағасы Сейітқазы Матаевтың айтуынша, бүгінгі күні әлеуметтік мәселелер тақырыбы айтарлықтай жиі көрсетілмей, өзектілігінен біршама айрылып қалды. Себебі журналистер қауымы ақылы материалдар жазудың соңына түсіп кетті. Әйтсе де, былайғы жұртшылық үшін әлеуметтік мәселе өз мәнін жойған жоқ және мұндай материалдар оқырмандардың кең ауқымы үшін шынайы өзекжарды мәселе болып табылады.