Алматыда «Баспа мен кітап саудасы арасындағы іс-қимыл» атты конференция өтіп жатыр

АЛМАТЫ. Тамыздың 25-і. ҚазАқпарат /Әділет Мұсахаев/ - Аталмыш шара Алматыдағы Гете-институтының баспа қызметкерлерінің біліктілігін арттыруға арналған жобасы аясында өтіп жатыр, деп хабарлайды ҚазАқпарат.

Гете-институтының кітапхана бөлімінің меңгерушісі Шолпан Қызайбаева аталмыш жобаның 2009-2011 жылдарға жоспарланғандығын және Қазақстанмен Қырғызстанды қамтитындығын айтады.

«Бұл жобаның негізгі мақсаты Шығыс Еуропа елдерімен Орталық Азиядағы кітап саудасы және баспа ісімен айналысатын адамдарға кәсіби қолдау көрсету болып табылады», дейді Ш.Қызайбаева.

Бүгінгі шара барысында Қырғызстан, Өзбекстан және Қазақстанның баспа мамандарына Германиядан келген сарапшылар «Демеушілік пен серіктестік», «Авторлық құқық пен лицензия», «Баспасөзбен бірлесе жұмыс істеу» және «Кітаптың безендірілуі мен дизайны» атты тақырыптарда баяндамалар оқып, талқылайтын болады

Ш.Қызайбаева бұған дейін де баспа ісімен айналысатын мамандар арасында семинарлар мен кездесулер өткізіп, олардың білімін жетілдіруге тырысқандықтарын жеткізді. «Германиядағы Франкфурт қаласында да өткен семинар мен кітап жәрмеңкесіне еліміздің мамандары қатысуға жолдама алып, тәжірибе алмасып келді», деп атап өтті Шолпан Қызайбаева.

Сондай-ақ ол еліміздегі кітап ісі 1990 жылдары құлдырауға түскенімен қазіргі кезде бұл сала алға қойылып, баспаларымыз өз бетінше дамып жатқандығын айтып өтті.