Алматыда бірқатар ғимарат жылусыз қалды

АЛМАТЫ. ҚазАқпарат– Алмалы ауданында жылу желісі істен шықты. Салдарынан бірқатар ғимарат жылусыз қалды, деп хабарлайды ҚазАқпарат тілшісі.

Жылу мен ыстық судан ажыратылған Айманов– Жандосов-Розыбақиев-Солодовников көшелерінің бойындағы бірқатар тұрғын үй мен ғимараттарға жылу бүгін түнгі сағат 24:00-ге дейін беріледі. Қазір ақау шыққан желілер қайта қалпына келтіріліп жатыр.

Алдын ала мәліметтер бойынша жылу бөлу қондырғысында қысым реттегіш істен шыққан.

«Жылу желілерін қалпына келтіру жұмыстарына «АлТС» ЖШС-нің 50 қызметкері мен 10 мамандандырылған техникасы жұмылдырылды.

Тұтынушыларға жылу беру кезең-кезеңімен жүзеге асырылады. Жылудан уақытша ажырату тұрғын үйлер мен басқа нысандардың ішіндегі температура режиміне әсер етпейді»,– деп хабарлады «Алматы жылу желілері» АҚ баспасөз қызметінен.