Фейсбук қолданушысы Тоқтар Жақаштың жазуынша, бүгін желіге шықпаған жүргізушілер сараланған тариф енгізілгенімен, олардың жалақысы 23-35 мың теңге аралығында қалған. Сондықтан, олар бүгін жұмысқа шығудан бас тартқан.
Ал, аталған бағдарларға жауапты «Green bus» транспорт компаниясы жағдайға қатысты өз ұстанымын білдірді.
«Сараланған тарифті енгізгенге дейін түсім жүргізушілердің қалтасында қалып отырды. 1 тамыздан, сараланған тарифті енгізгеннен бастап, автопарктердің табысы 40 пайызға артты. Енді бұл ақша жүргізушілердің қалтасына емес, автопаркке түседі. Жүргізушілер бұған наразы, күнделікті кіріс жоспарын төмендетуді сұрайды. Транзакция бойынша жоспар орындайтын жүргізушілер жақсы жалақы алады. Мәселен, бір қызметкер 14 күн істеп, 118 мың теңге алды. Ал, келесі қызметкер сонша жұмыс істегенімен жоспарды орындай алмай, ақша ұрлап, 51 мың теңге ғана алды. Енді олар жалақыны өсіруді талап етіп отыр. Мен не үшін оның жалақысын көтеруім керек. Күн сайын 20 мың теңгені қалтасына басып кеткені үшін бе? Біз олармен жиналыс өткіздік, жұмысқа шықпағандарды сотқа беріп, келтірген шығынды өндіріп алатын боламыз. Қазір резервтегі жүргізушілерді шақырып жатырмыз», - деді «Green bus» ЖШС Алматы қаласы бойынша директоры Бауыржан Кулишев.