Алматыда биыл кәсіпкерлердің 235 млн. теңге қаржылай шығын көрулеріне жол берілмеді

АЛМАТЫ. ҚазАқпарат - Бүгін Алматыда қалалық Кәсіпкерлер Палатасы Құқықтық блогының соңғы жеті айда атқарған жұмыстары бойынша баспасөз мәслихаты өтті. Өз сөзінде Палатаның кәсіпкерлер құқығын қорғау бөлімінің бастығы Салтанат Лесбаева соңғы кездері кәсіпкерлердің Палатаға жиі жүгінетіндігін айтты.

«Жыл басынан бері Палатаға өз құқықтарын қорғау мақсатында 660 кәсіпкер жүгінді. Олардың көтерген мәселелері көбінесе салық салуға, жер, сәулет және қала құрылысы заңнамаларына, байқаулар мен мемлекеттік сатып алуларға және сот шешімдеріне байланысты болып келеді», - деді С. Лесбаева.

Сонымен қатар, ол Палата сарапшыларының арқасында кәсіпкерлердің негізсіз шығындалуларына жол берілмегендігін айтты.

«Алматы қаласы Кәсіпкерлер Палатасы Құқықтық блогы жұмысының қорытындысы бойынша, жыл басынан бері кәсіпкерлердің 235 млн. теңгеден астам қаржылай шығын көрулеріне жол берілмеді. Сондай-ақ, 116 млн. теңге артық салынған салықтық міндеттемелер күшін жойды. Одан өзге, 24 млн. теңге көлемінде негізсіз салынған ауыртпалықтар да алынып тасталды», - деді С. Лесбаева.

Айтта кетелік, күні бүгінге дейін Палатаның кәсіпкерлердің құқығын қорғау бойынша Кеңесінің 6 отырысы болып өткен. Онда барлығы 17 мәселе көтерілді. Кеңес отырысының қорытындысы бойынша 24 кәсіпкерге нақты көмектер көрсетілді.