Алматыда «Happy New Year - Бақытты Жаңа жылыңызбен!» деген атпен І Халықаралық балалар фестивалі өтеді
«SUN RISE» мәдени-демалыс кешенінде болатын бұл шараны «Бейбітшілік әлемі» халықаралық қазақ шығармашылық бірлестігі ұйымдастырып отыр. Фестивальдың мақсаты:бүлдіршіндер мен жасөспірімдерге байқаулар, мәдени-танымдық экскурсиялар, кездесулер арқылы рухани байлығының жоғары болуына, өнерлі, білімді, абыройлы азамат болып қалыптасуына үлес қосу; жасөспірімдердің өнерін, көркем туындыларын, есімдерін тарихтың жаңа беттеріне жаза отырып, балғын және мектептік шақ жайлы ұмытылмас естелік қалдыру; Отанымыздың басқа өңірлерінен, түрлі ұлттарынан және көршілес елдерден жаңа достар табуына және достықты нығайтуына ықпал ету; ұстаздардың жаңа әріптестермен пікір, тәжірибе алмасуын ұйымдастыру болмақ.
Фестиваль 4 пен 14 жас аралығындағы жас таланттардың басын қосады. Олар мұнда: Вокал - эстрада, дәстүрлі ән, жыр, терме; Музыкалық аспаптарда ойнау шеберлігі (домбыра, сыбызғы, жетіген, баян, гитара); Би - классикалық, ұлттық, шығыс, батыс және африкалық билер; Көркем сөз (өлең, әңгіме), авторлық шығарма оқу, ертегі, «қырық өтірік» айту, әлемге танымал туындының философиясын жеткізу; театрландырылған қойылымдар, КТК, әзіл-сықақ, фокус өнері; интеллектуалдық көрме - логикалық ойындар жүргізу; барлық пәндер мен ғылымдардан білім таныту (математика және шет тілдерінен басқа); шахмат, дойбы, тоғызқұмалақ, асық, т.б. ойындар сайысы; Қолөнер көрмесі - қолөнер бұйымдары, көркемсурет, фотосурет, дизайн, жобалар көрмесі жанрлары бойынша өзара сайысқа түсетін болады. Онда ерекше талант танытқандар«Happy NEW YEAR» халықаралық фестивалінің лауреаты, «Таланттар академияның» жұлдызы», «Жұлдызды талант», «Хас талант», «Алтын Адам», «Ел мақтанышы», «Ғылым шырағы» Құрмет дипломдарымен, «ТалантSTAR», «АртSTAR», «ЖасSTAR» және Платина, Алтын, Күміс дипломдарымен, жетекші ұстаздар «Бейбітшілік әлемі» халықаралық қазақ шығармашылық бірлестігі президентінің грамотасымен, дипломдарымен, Алғысхатпен марапатталады.