Алматыда инвесторларға арналған сайт іске қосылды

АЛМАТЫ. ҚазАқпарат - Алматыда инвесторларға арналған investinalmaty.org сайты іске қосылды, онда инвесторлар мегаполистің инвестициялық әлеуеті туралы барлық қажетті ақпаратты ала алады, деп хабарлайды ҚазАқпарат тілшісі қалалық әкімдікке сілтеме жасай отырып.

Сайттағы барлық деректер ағылшын тілінде берілген, сондай-ақ олар «why», «what», «how», «assistance», «events» және «register» секілді 6 бөлімге бөлінген.

«Порталда әлеуетті және әрекет етіп жүрген инвесторларға сауда, қызмет көрсету, тамақ өндірісі, жеңіл өнеркәсіп, логистика және т.б. осы секілді инвестициялаудың басым салаларының тұсаукесерлері көрсетілетін болады. Бұдан басқа, инвесторлар Алматының жұмысы туралы пікірі мен ұсынымдарын қалдыра алады. Әрі қарай порталда «онлайн» режімінде Инвесторлар кеңесін, Инвестициялық форум және басқа да іс-шаралар өткізу жоспарланып отыр, сондай-ақ тұрақты түрде алдағы ивенттер туралы ақпаратты жаңартып отыру жұмысы өткізілетін болады», делінген хабарламада.