Алматыда Камал Смайыловты еске алу кеші өтеді
Камал Сейітжанұлы 1932 жылы 24 сәуірде Қарағанды облысының Ұлытау ауданындағы Сарлық ауылында өмірге келіп, 2003 жылы 25 маусымда Алматыда көз жұмды.
Көрнекті жазушы-публицист, мемлекет қайраткері, кинотанушы, өнертану ғылымының кандидаты, профессор К. Смайылов өзінің еңбек жолын 1954 жылы «Лениншіл жас» газетінде бастады. Одан кейін 1960-62 жылдары «Білім және еңбек» журналының алғашқы редакторы. 1971-73 жылдары Қазақстан комсомолы орталық комитетінің идеология жөніндегі хатшысы. 1977-80 жылдары Министрлер кеңесі мәдениет бөлімінің меңгерушісі. 1998-93 жылдары «Парасат», «Қазақстан коммунисі» ("Ақиқат") журналдарының бас редакторы. 1993-96 жылдары Қазақстан журналистер одағы басқармасының төрағасы сияқты жауапты қызметтерді атқарды. 9-11-шақырылған Қазақ КСР Жоғарғы Кеңесінің, 12-шақырылған Қазақстан Республикасының халық депутаты болып сайланды.
Оның қаламынан 15 публицистік-танымдық кітап пен өзекті мәселелерді көтерген 350-ден астам көркем очерктер, мақалалар және 3 томдық шығармалар жинағы шықты. Ерен еңбегі үшін 1984 жылы С. Сейфуллин атындағы әдебиет сыйлығын, 2003 жылы "Алтын Адам - жыл адамы" фестивалі байқауының "Қазақстанның 2003 жылғы патриоты" сыйлығын иеленді. Сондай-ақ 1971, 1976 жылдары екі рет "Құрмет белгісі" орденімен және әр жылдары түрлі медальдармен және құрмет грамоталарымен марапатталды.