Әуезов ауданы, Баянауыл шағынауданында орналасқан «КАР-СИТИ» сауда үйінде өрт кешкі сағат 5-тен 5 минут кеткенде шықты. Анықталғандай, ғимараттың жер төлесінде орналасқан автокөліктерге арналған бұйымдардың дүңгіршегі жанды.
ҚР ТЖМ Алматы қаласы бойынша ТЖД өртке қарсы қызметінің 48 адамы мен 17 техникасының көмегімен тілсіз жаудың ошағы 49 минутта жойылып, тағы жарты сағатқа жуық уақыттан кейін толығымен ауыздықталды.
Жалынның шарпыған жалпы аумағы 25 шаршы метрді құрады. Құтқарушылар анықтағандай, құрбандар мен зардап шеккендер жоқ.