Алматыда қазақстандық кәсіпқой боксшы Қанат Ислам шеберлік сыныбын өткізді
«Мен қазір WBA тұжырымы бойынша әлемде бесінші орында тұрмын. Ендігі жекпе-жектердің барлығы өте маңызды болмақ. Сәйкесінше, биылғы жылы күзде немесе келесі жылдың басында маңызды жекпе-жегім өтуі ықтимал. Тіпті, алдағы тамыз айында да осындай кездесулердің бірі ұйымдастырылуы мүмкін. Қазір, менің командаммен бірқатар белгілі промоутерлік ұйымдар келіссөздер жүргізіп жатыр. Мен өзім чемпиондық атаққа таласуға дайынмын. Сол үшін, бүгін жаттығуымды бастап жібердім», - деді Қанат Ислам.
Өз кезегінде осы «AIDAR CLASSIS» кәсіпқой бокс клубының директоры, әуесқой бокстан Қазақстанның бірнеше дүркін чемпионы, бүгінде кәсіпқой бокстан отандық Diamond Ring промоутерлік ұйымының құрамында өнер көрсетіп жүрген Айдар Шәрібаев жастардың бокс жұлдыздарымен кездесіп тұруы өте маңызды екендігін айтты.
«Бокс - Қазақстанда нөмірі бірінші спорт түрі. Бұл қазақтың қанына жақын спорт. Жұдырықтасу, күресу біз үшін үйреншікті өнер. Қазақтың балалары бір-бірімен алысып өседі ғой. Дегенмен, біз қашанда ертеңгі күнді ойлауымыз керек. Ол үшін боксқа ден қойған жастарымызды тек жаттықтырып, жарыстарға қатыстырып қана қоймай, оларды қазір бокс әлемінде даңққа бөленіп жүрген, биік жетістіктерге қол жеткізген ағаларымызбен тұрақты түрде кездестіріп тұруымыз керек. Мұның кездесулердің жастарға берер тәрбиелік мәні өте зор. Олар алдыңғы ұрпақ ағаларын үлгі тұтып, елін сүйген азамат болып өсетін болады», - деді А. Шәрібаев.
Айта кетелік, «AIDAR CLASSIS» кәсіпқой бокс клубында көп балалы және әлеуметтік аз қамтылған отбасылардың балалары тегін жаттыға алады.
Ал шеберлік сыныбы өте қарқынды және қызықты өтті. Оған қатысқан жастар атақты боксшының әрбір қимыл-қозғалысын қалт жібермей бақылап, айтқан ақыл-кеңестерін зейін қойып тыңдады және көрген-білгендерін кейін жеке жаттығу барысыда жүзеге асыруға тырысты.
Ал Қанат Ислам жастардың қойған әр түрлі сұрақтарының барлығына ерінбей риза көңілмен жауап берді.