Алматыда кітап шығару тәжірибесіне арналған халықаралық конференция өтуде
Екікүндік бұл шараны ұйымдастырған әл-Фараби атындағы Қазақ ұлттық университеті Журналистика факультетінің Баспа ісі және дизайн кафедрасы. Конференцияның мақсаты - кітап шығару мен кітап таратудың қазіргі таңдағы жағдайын, ғылыми-әдістемелік зерттеулердің барысын, Қазақстан ақпараттық кеңістігінің бәсекеге қабілеттілігін қалыптастыру жолдарын іздеу мәселелерін талдау және талқылау.
Оның жұмысы Қазақстандағы және шет елдердегі электрондық кітаптардың қазіргі нарықтық жағдайы; Сандық дәуірдегі баспа ісі. Бизнестің жаңа түрі; Қазіргі жағдайға сай авторлық құқық туралы заңнаманы дамыту; Отандық және шетелдік тәжірибедегі менеджмент пен маркетинг: интеграция және инновация; Әлеуметтік мәдениет құрылымының құбылуы мен қоғам жаңғыруындағы кітаптың ролі; Жаһандану жағдайындағы кітаптанудың мәденитанымдық мәселелері; Жарнама мен РR-дағы құндылық нысандары: ҚР БАҚ дамуының әлеуметтік және корпоративтік векторлары; Баспа ісі саласындағы мәтін теориясы мәселелері тақырыптары бойынша жүруде.