Алматыда көрнектi ғалым Қасым Асановқа арналған ескерткіш тақта ашылды

Социалистiк Еңбек Ерi Қасым Әбуұлы Асановқа арналған мемориалдық тақта ашылды.

Ғалымның есімін мәңгі есте қалдыру мақсатында ашылған ескерткіш тақта оның соңғы жылдары тұрған үйіне қойылды. Тақтаның ашылу салтанатына ғалымның туған-туыстары мен шәкірттері, қала әкімдігінің өкілдері, ҰҒА -ның ғалымдары қатысты.

"Қасым Асанов - білім мен ғылымға, ауылшаруашылық саласының өркендеуіне аянбай қызмет жасаған үлкен азамат. Лайықты адамға ескерткіш тақтаның қойылуы - ол жастарға деген тәрбие. Өйткені, ғалымның істеген істері, артында қалдырған еңбектері, ол өсіп келе жатқан біздің жастарымызға, қала берді халқымыздың, Қазақстанның аграрлық білім-ғылым саласының өркендеуіне өшпес қалдырған із. Бүгінгі тақтаның қойылуын ағайын-туыс үшін емес, бүкіл қазақ халқы үшін, бүкіл ғалымдар үшін, қазақтың білім мен ғылымын сыйлағанның нәтижесі деп айтуға болады", -деді тақтаның ашылу салтанатында Ресей академиясының және Қазақстан Ұлттық ғылым академиясының академигі Рақымжан Елешов.

Қ. Асанов - мал шаруашылығы ғылымдары мектебінің негізін қалаушы, 150-ден астам ғылыми еңбектер мен мал шаруашылығының маңызды мәселелеріне арналған 9 монографияның авторы. Ғалым қазақ, орыс, ағылшын тілдерінде жарық көрген «Қазақстандағы мал шаруашылығы» атты тұңғыш оқулықтың авторы. Ол сонымен қатар ауыл шаруашылығы саласында ғалымдарды, мамандарды дайындауға теңдессіз үлес қосқан тұлға. Ұзақ жылғы жемісті еңбегі нәтижесінде Қ.Асанов «Ленин», «Құрмет белгісі», «Еңбек Қызыл Ту», «Халықтар достығы», «Парасат» ордендерімен, медальдармен марапатталған.