Алматыда Мақпал Жүнісованың ән кеші өтеді

АЛМАТЫ. Мамырдың 4-і. ҚазАқпарат /Ерлік Ержанұлы/ - Алматыда мамырдың 9-ы күні ҚР халық әртісі, Мемлекеттік сыйлықтың иегері, әнші Мақпал Жүнісованың «Көктем келді, дүние жыр жырлайды...» деп аталатын ән кеші өтеді,

деп хабарлайды ҚазАқпарат. «Республика сарайында өтетін бұл кеште барлығы 25 ән орындалады. Олардың жеті-сегізі домбырамен айтылады. Ал жаңадан орындалатын шығармалардың саны 15. Олардың қатарында «Бір бітпес арман», «Сағындым сонау күндерді», «Ғашықтар термесі», «Қия алмай қарап тұрдым мен», «Көктемім менің» және тағы басқа да әндер бар. Көктем болған соң онда негізінен махаббат туралы әндер мен Жеңіс күніне арналған «Ана туралы баллада», «Мәншүк пен Әлия» деген сияқты туындылар шырқалады», дейді Мақпал Жүнісова. Әншінің айтуынша, оған Мұрагер Сауранбаев бастаған күйші жігіттер, «Аққу-Гәкку», Құрманбек пен Риза, Мұрат пен Кәрима Мұтырғановтар және жаңа есімдерден Әлия, Гүлнәр деген әнші қыздар қонақ ретінде қатыспақ.