«Егер карантин жағдайында біз қылмыс деңгейінің төмендегенін байқасақ, өрт оқиғалары бойынша жағдай бұрыңғы қалпында. Осы жылдың бірінші тоқсанында өрт саны бір оқиғаға азайып, барлығы 138 өрт оқиғасы тіркелді, 3 адам құтқарылып, 58 адам қауіпті аймақтардан эвакуацияланды»,– деді Алматы қалалық ТЖД басшысы Серік Әубәкіров брифинг барысында.
Оның айтуынша, қазір күн ысып кетуіне байланысты құрғақ шөптер мен қоқыстардың өртенуі орын алуда. 1 ақпаннан бастап құрғақ шөптің жануы бойынша 175 жағдай тіркеліп, өрт 29 гектар жерді шарпыды. Бұл өткен жылдың осы кезеңімен салыстырғанда 13% - ға артық. Құрғақ шөптердің өртенуі көбіне Түрксіб, Алатау, Медеу аудандарында орын алады.
Сонымен қатар, ол күштер мен құрылымдардың жауынгерлік дайындық деңгейін арттыру үшін ТЖД-де табиғи өрттерді сөндіруге арналған жедел әрекет етуші топ құрылғанын атап өтті.
Жалпы, тау-орман алқабында жоғары деңгейдегі өрт туындаған жағдайда оны сөндіруге 300-ден астам жеке құрам, жоғары қозғалтқыштағы 23 бірлік техника, 500 қапшықтағы өрт сөндіргіші, 500 күрек және 156 жарылғыштар дайын тұр.
Сондай-ақ, Іле – Алатау ұлттық паркінің балансында 6 өрт мұнарасы, 1 өрт сөндіру көлігі, 4 мотор сорғысы, 88 қапшықтағы өрт сөндіргіш, 1263 жарылғыш, 106 балта, 4 білезік тізбек және 322 күрек бар.
Сонымен қатар, өрттерді сөндіру және авариялық-құтқару жұмыстарын жүргізу үшін Алматы қаласы әкімдігі 109 құтқару қызметінің және ҚР ІІМ ТЖК «Қазавиақұтқару» АҚ-ың тікұшақтары қатысады.
Таулы-орманды жерлерде өрттердің алдын алу үшін жыл сайын жергілікті полициямен бірлесіп патрульдеу жүргізіледі. Өткен жылы 400-ден астам от жағу жағдайға тыйым салынды, 35 жеке тұлға әкімшілік жауапкершілікке тартылды.