Бұл туралы бүгін журналистермен болған брифингте Ішкі істер министрлігінің ресми өкілі Нұрділдә Ораз мәлім етті.
«Алматының полиция қызметкерлері арнайы операция өткізіп, 10,5 грамм героинді сатып жатқан жерінен Тәжікстанның 29 және 45 жастағы екі азаматын құрықтады. Олардың жалға алып тұрып жатқан пәтерін тексеру кезінде 930 грамға жуық героин табылып, тәркіленді. Есірткіні сату фактісі бойынша қылмыстық іс қозғалды, ұсталған адамдар қамауға алынды»,-деді ресми өкіл.
Бұдан бөлек, Оңтүстік Қазақстан облысының полицейлері ІІМ Есірткі бизнесіне қарсы күрес комитетінің және арнайы мақсаттағы бөлімінің қызметкерлерімен бірлесіп, «Қызыл ту» бекетінде Сарыағаш қаласының тұрғынына тиесілі «Мазда» автомашинасын тоқтатқан. Автокөліктің салонын тексеру кезінде 62 жастағы жолаушының сөмкесінен жалпы салмағы 12,5 келі гашиш салынып, скотчпен оралған 11 түйіншек табылып, тәркіленді.
Ұсталған ер адам уақытша ұстау абақтысына қамалды. Тергеу амалдары жүргізілуде.