ҚР Мәдениет және спорт министрлігі спорт және дене шынықтыру комитетінің баспасөз қызметінен хабарланғандай, ҚР Ұлттық спорт қауымдастығы ұйымдастыруымен өтетін Жастар арасындағы І Ашық Азия чемпионатында Қазақстан, Венгрия, Ресей, Қытай, Монғолия, Өзбекстан, Тәжікстан, Ауғанстан, Қырғызстан мемлекеттерінің жастар командалары бақ сынайды. Чемпионаттың бас төрешісі - ҚР Ұлттық спорт түрлерінен мемлекеттік бас жаттықтырушы Қуанышбек Құрамаев. Сондай-ақ, көкпар, аударыспақ, теңге ілу және жамбы ату спортының бас төрешілері анықталған. Атап айтқанда, көкпар спортына - Нұрдәулет Момынов, аударыспақ спортына Жанысбек Саев, теңге ілу спортына - Рамазан Махатов, жамбы ату спортына - Елдос Бадашев бас төреші болып бекітілген.
«Қазіргі кезде Тараз қаласында көкпар спортынан І Азия чемпионатының оқу-жаттығу жиыны басталып кетті. Көкпардан ҚР Жастар ұлттық құрамасын жаттықтырушы - ҚР Жастар мен жасөспірімдер командасының аға бапкері Атамекен Рүстемов. Бұл оқу-жаттығу жиынына биылғы Жастар арасындағы Қазақстан чемпионатында үздік деп танылған жиырмаға жуық көкпаршы қатысуда. Екі апталық оқу-жаттығу жиынынан соң көкпардың білікті мамандары шешімімен көкпардан ҚР Ұлттық жастар құрама командасы жасақталады. І Азия чемпионатында Қазақстан намысын қорғайтын спортшылар есімдері де сол кезде белгілі болмақ», - делінген хабарламада.
Ал, ұлттық спорттың жамбы ату, аударыспақ, теңге ілуден І Азия чемпионатына даярлық үшін өтетін оқу-жаттығу жиыны 3 сәуір күні басталды. Бірер күнде Тараздағы аталмыш оқу-жаттығу жиынына Ауғанстан Жастар құрама командалары келіп қосылады деп күтілуде.