Алматыда Ұлттық ұлан әскери қызметкерлері Мемлекеттік рәміздер күнін атап өтті
Аталмыш шараға «Оңтүстік» өңірлік қолбасшысының бірінші орынбасары, штаб бастығы, генерал-майор Андрей Каселенов, қолбасшылықтың және 5571 әскери бөлімінің жеке құрамы, сондай-ақ, «Нұр Отан» партиясы саяси кеңесінің мүшесі, Ішкі Әскерлер ардагері Әділ Несіпбаев қатысты.
Алдымен жеке құрамнан 1000-ға жуық сардарлар мен жауынгерлер саптық алаңға жиналып, сап түзеп тұрды. Содан кейін, «Оңтүстік» өңірлік қолбасшысының бірінші орынбасары, штаб бастығы, генерал-майор Андрей Каселенов 5571 әскери бөлімінің штаб бастығы, подполковник Б. Есжановтың баяндамасын қабылдады.
Бұдан соң, «Оңтүстік» қолбасшылығының Тәрбие және әлеуметтік құқықтық Басқармасының бастығы, полковник Ниязтай Әлкешев сөз сөйлеп, жеке құрамды мерекенің тарихымен және маңыздылығымен таныстырды.
«Бүгінгі шараны ұйымдастырудағы басты мақсат - еліміздің Мемлекеттік рәміздерін барынша насихаттау. Сол арқылы сарбаздарымызды патриоттық рухта отансүйгіштікке тәрбиелеу. Отанын шын сүйген сарбаз өзінің отан алдындағы азаматтық борышын, қандай ауыр болса да абыроймен атқара алады. Бізде Мемлекеттік рәміздерді насихаттау жұмыстары бүгін және ертең тәрбие және ақпараттық сағаттарда жалғасатын болады. Оған бүгін кезекшілік қызметте болған сардарлар мен сарбаздар қатысады», - деді «ҚазАқпарат» тілшісіне берген жауабында полковник Н. Әлкешев.
Айта кетелік, бүгінде Қазақстан Республикасының Ұлттық Ұланы «Оңтүстік» өңірлік қолбасшылығының құрамында 11 әскери бөлім бар. Олардың ішінде 2 әскери бөлім Шымкент қаласында, 1 әскери бөлім Тараз қаласында, 2 әскери бөлім Алматы облысындағы Ұзынағаш кентінде және тағы бір әскери бөлім Талдықорған қаласында орналасқан. Қалғандары Алматыда. Барлығында да Мемлекеттік рәміздер күні атап өтіліп, күндізгі сағат 12:00-де Мемлекеттік Ту көтеріліп, Мемлекеттік әнұран орындалды. Ұйымдастырушылардың айтуынша, бұл шараға жеке құрамдар 100 пайыз қатысқан.