Алматыда «Ұлтым деп соққан жүректер» деп аталатын өмірдерек жарық көрді

АЛМАТЫ. Мамырдың 7-сі. ҚазАқпарат /Ерлік Ержанұлы/ - Бүгін Алматыда «Ұлтым деп соққан жүректер» деп аталатын өмірдерек жинағының тұсаукесері болды,

деп хабарлайды ҚазАқпарат. «Қозғалыс алғаш құрылған кезде ұлт қайраткерлеріне түрлі аталымдар бойынша «Тау көтерген Толағай» деген сыйлық бергенбіз. Шынында да халық үшін, ұлт үшін жұмыс істеп жүрген адамдарды билік барлық кезде елеп-ескере қоймайды. Сондықтан біз оларға ұйымның атынан рахмет айтқымыз келді. Бұл сол жұмыстың жалғасы сияқты. Осы жолы 1990 жылдардан бастап ұлттық мәселеге өздерінің азаматтық жүректерімен араласып, қолдарынан келген жұмыстарын жасап жүрген, әсіресе, саяси- қоғамдық бағытта жасап жүрген адамдардың бәрін жинаққа кіргізуге тырыстық. «Ұлтым деп соққан жүректер» өмірдерегі анықтамалық кітап. Біз осы арқылы бұл азаматтарды тарихта қалдырғымыз келді», дейді «Ұлт тағдыры» қозғалысының төрағасы Дос Көшім.«Ұлт тағдыры» қозғалысының кітапханасы айдары бойынша шығарылған жаңа еңбектің құрастырушысы «Жерұйық» қоғамдық бірлестігінің төрағасы Болатбек Төлепберген. Ол «КИЕ» лингвоелтану инновациялық орталығында» жарық көріп отыр. «Ұлт тағдыры» қозғалысының басқарма мүшесі Болат Дүйсенбінің айтуынша, ұлттық мәселемен шұғылданып, ұлттың намысын қорғап жүрген азаматтардың көбі билік тарапынан қошемет көріп жүрген жоқ. Халық біреуін білсе, екіншісін білмейді. Оларды елге ешкім таратып, насихаттамайды. Сондықтан да «Ұлт тағдыры» қозғалысы бұл азаматтардың еңбектері мен істеген істері жолда қалмасын деп осы шараға ұйтқы болып отыр. «Бастапқыда оған 200-ден астам адамды енгізбек болғанбыз. Алайда түрлі себептермен тек 105-і туралы ғана қажетті материалдарды жинастыра алдық. Іздестіру жұмыстары былтыр жазғытұрым басталған. Алдымен өзіміз білетін ұлт мәселесімен шұғылданатын азаматтарға ұсыныс бердік. Жинаққа егемендік алғаннан бергі кезеңдегі адамдар ғана іріктеліп алынды», дейді Болат Дүйсенбі.