Америкалық қыз өзіне тап берген акулаға тойтарыс берді

АСТАНА. ҚазАқпарат - Флорида жағалауында (АҚШ) 17 жасар қыз акула шабуылынан аман қалды. Бұл туралы The Huffington Post басылымы 4 сәуірде хабарлады.

Оқиға Дестин қаласының жағалауында болған. Онда Кентукки тұрғыны Кейтлин Тейлор (Caitlyn Taylor) анасымен және достарымен демалуға барған. Теңізге түсіп, тереңдігі белуардан келетін жерде жүзген қыз өзіне қарай толқынның жақындап қалғанын байқаған. Дельфин  деп ойлаған қыз жағаға асыққан.

Алайда, ол дельфин болмай шықты, жүзіп келген акула Тейлордың аяғына бас салған. Акуладан құтылу үшін Тэйлор оның тұмсығынан соққан. Соның арқасында жыртқыш балықтың жағы ашылып, шегедей тістері қадалған аяқты босатқан.

Акула тістері қыз аяғының алты жеріне түйрелген. Дәрігерлер 80 жерден тігіс салды.