Әмір Омарханов Президент кубогында ел намысын қорғайды

АСТАНА. KAZINFORM – Астана қаласында теннистен Президент кубогы аясында 27 шілде – 16 тамыз аралығында ATP Challenger Tour және ITF World Tennis Tour турнирлері өтеді.

Биыл 18-ші рет ұйымдастырылып отырған Президент кубогында ел намысын Григорий Ломакин, Әмір Омарханов, Заңғар Нұрланұлы, Дамир Жалғасбай, Аружан Сағындықова, Асылжан Арыстанбекова, Сандуғаш Кенжебаева және басқа теннисшілер қорғайды. 

Аталмыш додада кезінде Даниил Медведев, Андрей Рублев, Карен Хачанов, Себастьян Корда, Роман Сафиулин, Миомир Кецманович сияқты белгілі спортшылар өнер көрсетті.
Қазақстан теннис федерациясы Президент кубогын 1991 жылдан бері өткізіп келеді. 2007 жылы халықаралық мәртебе алған жарыста әр жылдары қазақстандықтар Михаил Кукушкин мен Андрей Голубев, украиналық Илья Марченко, аустриялық Себастьян Оффнер, Германия құрамасының қазіргі капитаны Райнер Шуттлер,

Аустралия ашық чемпионаты мен Ролан Гаррос турнирінің жеңімпазы, хорватиялық Иван Додиг, жұптық сында «Үлкен дулыға» турнирінің екі дүркін чемпионы, қытайлық Чжан Шуай және басқалар үздік шықты.

Еске сала кетейік, бұдан бұрын Зарина Диястың Португалиядағы турнирде камбэкпен ширек финалға өткенін жазған едік.

Сондай-ақ Әмір Омарханов алғаш рет Уимблдон турнирінің жартылай финалына жолдама алды.

Бүгін Ә.Омарханов жұптық сында ресейлік Егор Плешивцевпен бірге Уимблдон додасының финалына шығу үшін таласады.