ӘМСҚ-ның 2024 жылғы комиссиялық сыйақысы ұлғайтылмақ
АСТАНА. KAZINFORM — Әлеуметтік медициналық сақтандыру қорының комиссиялық сыйақы пайыздық мөлшерлемесінің шекті шамасы өзгермек. Тиісті бұйрық Ашық НҚА порталында жарияланды.
«Қордың 2024 жылға арналған қызметін жүзеге асыруға Қазақстан Республикасының Үкіметі белгілеген шекті шама шеңберінде «Әлеуметтік медициналық сақтандыру қоры» коммерциялық емес акционерлік қоғамының комиссиялық сыйақы пайыздық мөлшерлемесінің шекті шамасы есепті айда қордың шотына түскен активтер мөлшерінің 1,60 пайызы белгіленсін», — делінген құжатта.
Құжат негіздемесінде жазылғандай, 2024 жылға арналған МӘМС-ке жарналар мен аударымдар түсімдерінің болжамы ағымдағы жылы Әлеуметтік медициналық сақтандыру қорына (ӘМСҚ) «Міндетті әлеуметтік медициналық сақтандыру туралы» ҚР Заңында айқындалған жарналар төлеуден босатылған ҚР азаматтары үшін МӘМС-ке мемлекет жарналарының түспеуі себебінен 1 456 277 930 мың теңгеден (бастапқы нақты болжам) 1 090 648 627 мың теңгеге (пессимистік болжам) дейін азаяды.
Мәселен, 2024 жылға арналған мемлекет жарналары бойынша жоспар — 541 276 690 мың теңге, биылғы қаңтар-мамыр айларында ӘМСҚ-ға 190 712 776 мың теңге сомасында мемлекет жарналары аударылды.
«2024 жылы мемлекет жарналарының түспеу болжамы 310 967 947 мың теңгені құрайды. Осыған байланысты, биыл жыл соңына дейін қордың 2024 жылы 3 062 156 мың теңге сомасына «кассалық алшақтық» және тиімсіз қордың міндеттемелерін төлемеу тәуекелдері туындайды. Мәселен, биылғы жылғы 25 қарашадағы жағдай бойынша Қордың 2024 жылға арналған Даму жоспары бойынша орындалмаған міндеттемелер сомасы 3 656 755 млн теңгені құрайды», — делінген талқылауға шығарылған бұйрық жобасында.
ӘМСҚ-ның қаржылық орнықтылығын қамтамасыз ету мақсатында денсаулық сақтау субъектілерін қаржыландыру бойынша оның стратегиялық міндеттерін іске асыру үшін мемлекеттің биыл маусымнан бастап МӘМС-ке жарналарды аудару жөніндегі міндеттемелерді орындамауына байланысты 2024 жылға арналған ӘМСҚ комиссиялық сыйақысының пайыздық мөлшерлемесінің шекті шамасын 2024 жылғы 1 маусымнан 31 желтоқсанға дейін 1,18%-дан 1,60-ға дейін ұлғайту ұсынылады.
Еске салсақ, бұдан бұрын Әлеуметтік медициналық сақтандыру қоры 2,4 трлн теңгеге медициналық қызметтер сатып алатыны хабарланды.