ОРАЛ. ҚазАқпарат – Оралда 5 жасар бала төртінші қабаттағы терезеден құлап кете жаздады, деп хабарлайды ҚазАқпарат тілшісі.
БҚО Полиция департаментінің баспасөз қызметі мәлім еткеніндей, оқиға 25 қараша күні Әбубәкір Кердері көшесі, 125 мекенжайында болды.
Шамамен сағат 13.00-де 102 телефонына төртінші қабатта ашық тұрған терезенің жақтауында баланың тұрғаны жөнінде хабар түскен.
Сол бойда осы маңда жүрген патрульдік полиция батальонының экипажы мен учаскелік инспектор жіберілді.
Полицейлер баланы шошытып алмас үшін жайлап есік арқылы сөйлескен. Сосын баланың терезеден түсіп, есікті ашуына қол жеткізген. Пәтерде одан басқа ешкім болмаған.
Қауіп сейілгеннен кейін полиция қызметкерлері баланың анасын іздеп тапты. 23 жастағы анасының сөзіне қарағанда, бала түске дейін мектепке дейінгі мекемеге барады, өзі жұмыста болған соң түсқайта үйде жалғыз қалады екен. Әйелмен түсінік жұмыстары жүргізілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).