АСТАНА. KAZINFORM – Анкара прокуратурасының Лаңкестікпен күрес басқармасы Түркия астанасында ДАИШ лаңкестік ұйымына (Қазақстанда тыйым салынған) қатысы болуы мүмкін деген күдікке ілінген 11 адамның ұсталғанын хабарлады, деп жазды АЗЕРТАДЖ ақпарат агенттігі.
Агенттіктің хабарлауынша, прокуратура жалпы 12 адамның іздеуде жүргенін хабарлады, оның 11-ін жедел уәкілдер ұстады, бір адамды іздеу амалдары жалғасып отыр.
Осындай операциялар өткен аптада Түркияның төрт провинциясында жүргізілді. Хабарланғандай, 16 адам ұсталған, оның 10-ы ДАИШ лаңкестерімен байланысы бар деген айыппен сот шешімімен қамауға алынды.
Еске сала кетейік, бұған дейін Сауд Арабиясы Магдебург базарындағы лаңкестік әрекетті айыптағанын жазған едік.
Зарина Туғанбаева
Л.Н. Гумилев атындағы Еуразия Ұлттық университетінің түлегі. Еңбек жолын Ақмола облысы Целиноград аудандық «Ұран», «Призыв» газеттерінде тілші болып бастаған. Kazinform ақпарат агенттігінде 2011 жылдан бері қызмет атқарып келеді.