АСТАНА. KAZINFORM — Қазақстанның жұптық сындағы бірінші, әлемнің 10-ракеткасы Анна Данилина Кливленд (АҚШ) WTA 250 турнирінің финалына жолдама алды.
Жарыстың 1-ракеткалары Анна Данилина — Александра Крунич жартылай финалда чехиялықтар Анастасия Детюк — Мириам Скочпен шеберлік байқасты.
Қазақстандық-сербиялық жұп бірінші партияда 6:2 есебімен басымдылық танытса, екінші сетте де өз мүмкіндігін жіберген жоқ — 6:4.
Бір сағат 19 минутқа созылған бәсекеде Данилина — Крунич эйс жасамағанымен, 14 брейк-пойнттың бесеуін пайдаланды. Детюк — Скоч 2 брейктен (3 брейк-пойнт) аса алмады.
Анна Данилина — Александра Крунич соңғы бәсекеде тайбэйлік Чань Хаочин — Синью Яньмен чемпиондық атақты сарапқа салады.
Еске сала кетейік, бұдан бұрын Анна Данилинаның АҚШ-тағы жарыстың жартылай финалына өткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).