АСТАНА. ҚазАқпарат - Қазақстанның жұптық сындағы бірінші ракеткасы Анна Данилина Чехияның Яблонец-над-Нисоу қаласында өткен ITF W25 турнирінің жеңімпазы атанды, деп хабарлайды ҚазАқпарат тілшісі.
А. Данилина украиналық Валерия Страховамен бірге жарыстың бірінші ракеткасы болып тіркелді.
Қазақстандық-украиналық жұп финалға дейін қиналмай жетті.
Соңғы бәсекеде Данилина мен Страхова германиялық Лена Пападакис - чехиялық Анна Сискованы 7:5, 6:1 есебімен тізе бүктірді.
Осылайша, А. Данилина спорттық жолында ITF додаларында 27-титулына қол жеткізді. Сонымен қатар, Анна WTA жарыстарының үш дүркін чемпионы атанған еді.
Еске сала кетейік, бұдан бұрын теннистен Дэвис кубогында Қазақстан тобында ширек финалға шыққан командалар анықталғанын жазған болатынбыз.
Сондай-ақ, қазақстандық жасөспірім теннисшілер алғаш рет Азия чемпионы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).