АСТАНА. KAZINFORM — Қазақстанның жұптық сындағы бірінші, әлемнің 10-ракеткасы Анна Данилина Доха (Қатар) WTA 1000 турнирін сәтті бастады.
Сербиялық Александра Круничпен бірге жарыстың 4-ракеткасы болып тіркелген А.Данилина екінші айналымда канадалық Лейла Фернандес – франциялық Кристина Младеновичке тап келді.
Бірінші партияда қазақстандық-сербиялық жұп 6:2 есебімен басым түсті.
Екіншісінде канадалық-франциялық дуэт есе қайырды – 6:4. Дегенмен супер тай-брейкте Данилина – Крунич жеңісті жұлып алды – 10:4.
Бір сағат 21 минутқа созылған бәсекеде Данилина – Крунич 2 эйспен бірге 6 брейк-пойнттың төртеуін пайдаланды. Фернандес – Младенович 3 брейкпен ерекшеленді.
Анна Данилина – Александра Крунич жартылай финалға шығу үшін аустралиялықтар Сторм Хантер - Майя Джойнтпен таласады.
Бұдан бұрын А.Данилина – А.Крунич Аустралия ашық чемпионатының финалына дейін жеткен еді.
Еске сала кетейік, бұдан бұрын Елена Рыбакинаның Дохадағы турнирдің үшінші айналымына жолдама алғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).