Қазақстанның жұптық сындағы – бірінші, әлемнің 32-ракеткасы Анна Данилина Гонконг WTA 250 турнирінің ширек финалына жолдама алды, деп хабарлайды Kazinform.
Жарыстың бірінші ракеткасы болып тіркелген А.Данилина ресейлік Александра Пановамен бірге алғашқы айналымда Гонконг өкілдері Юдис Чонг – Хон-И Коди Вонмен шеберлік байқасты.
Бірінші партияда гонконгтық теннисшілер 6:3 есебімен басым түскенімен, екіншісінде А.Данилина – А.Панова бет қаратқан жоқ – 6:0. Содан кейін супер тай-брейкте жеңісті жұлып алды – 10:7. 1 сағат 15 минутқа созылған бәсеке барысында қазақстандық-ресейлік жұп 1 эйске қоса 11 брейк-пойнттың үшеуін өз есептеріне жазды.
Анна Данилина – Александра Панова жартылай финалға шығу үшін ресейліктер Софья Лансере – Камилла Рахимовамен таласады.
А.Данилина жекелей сында да өнер көрсетіп, бірінші айналымда әлемнің 70-ракеткасы, Польша өкілі Магдалена Фрешке есе жіберді – 2:6, 2:6.
Еске сала кетейік, бұдан бұрын Денис Евсеевтің Қытайдағы турнирдің 1/8 финалына шыққанын жазған болатынбыз.
Сондай-ақ Андрей Голубев Словакиядағы жарыстың жартылай финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).