Қазақстандық Анна Данилина Гонконг WTA 250 турнирінің іріктеу сайыстарын сәтті өткізді, деп хабарлайды Kazinform агенттігі.
Қазақстандық теннисшінің жұптық сында әлемдік рейтингте 32-орында тұрғаны белгілі.
Бұл жолы Гонконгта жекелей сында да өнер көрсетуді жөн көрген А.Данилина дүниежүзілік рейтингте 1016-сатыда тұрғанына қарамастан іріктеу сатысында екі кездесуін де жеңіспен аяқтады.
Алдымен ол әлемнің 235-ракеткасы, үндістандық Карман Каур Тхандиді үш сағатқа жуық уақытқа созылған тартысты бәсекеде 7:6 (7:2), 6:7 (4:7), 6:2 есебімен тізе бүктірді.
Іріктеу сайысының финалында Анна әлемнің 367-ракеткасы, ресейлік Дарья Лодикованы 6:4, 6:2 есебімен жеңді.
Осылайша негізгі додаға өткен Анна Данилинаның келесі қарсыласы кейін анықталады.
Тағы бір қазақстандық, рейтингте 68-орындағы Юлия Путинцева алғашқы айналымда әлемнің 37-ракеткасы, ресейлік Анна Блинковамен шеберлік байқасады.
Еске сала кетейік, бұдан бұрын Қазақстаннан екі бірдей жас теннисшінің ТОП-100 қатарына кіргенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).