АСТАНА. KAZINFORM — Қазақстанның жұптық сындағы бірінші, әлемнің 6-ракеткасы Анна Данилина Монтеррей (Мексика) WTA 500 турнирін жеңіспен бастады.
Жапониялық Мию Катомен бірге жарыстың 4-ракеткасы болып тіркелген қазақстандық теннисші бастапқы кездесуін қытайлық Чань И Тан – мексикалық Рената Сарасуамен өткізді.
Бірінші партияда қытайлық-мексикалық жұп 6:4 есебімен басым түсті.
Дегенмен бұдан кейін А.Данилина – М.Като камбэк жасай білді – 6:2, 10:6.
Бір сағат 24 минутқа созылған бәсекеде Данилина – Като 1 эйспен бірге 13 брейк-пойнттың төртеуін өз есебіне жазды. Қытайлық-мексикалық дуэт 2 эйс, 3 брейкпен (6 брейк-пойнт) көзге түсті.
Анна Данилина – Мию Катов жартылай финалға шығу үшін ресейлік Мария Козырева – ұлыбританиялық Майя Люмсденмен таласады.
Монтеррей додасы 30 тамызда мәресіне жетеді.
Еске сала кетейік, бұдан бұрын Тимофей Скатовтың АҚШ ашық чемпионатының іріктеу сайысын сәтті бастағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).