АСТАНА. KAZINFORM — Қазақстанның жұптық сындағы бірінші, әлемнің 9-ракеткасы Анна Данилина Лондон WTA 500 турнирінің финалына шықты.
Қазақстандық теннисші ресейлік Диана Шнайдермен бірге жартылай финалда аустралиялық Эллен Перес — қытайлық Чжан Шуаймен сынға түсті.
Бірінші партияда қазақстандық-ресейлік жұп 6:3 есебімен басымдылық танытты.
Екіншісінде аустралиялық-қытайлық дуэт қарымта қайырды — 6:2.
Супер тай-брейкте Данилина — Шнайдер сәтті ойнады — 11:9.
Бір сағаттан астам уақытқа созылған бәсекеде Данилина — Шнайдер 1 эйспен бірге 6 брейк-пойнттың екеуін пайдаланды. Перес — Шуай 3 эйс, 2 брейкпен көзге түсті.
Анна Данилина — Диана Шнайдер финалда америкалық Айша Мухаммад — нидерландылық Деми Схурспен чемпиондық атақты сарапқа салады.
Анна Данилина осымен қатарынан екі ірі жарыста финалға шығып отыр. Ол өткен аптада Ролан Гаррос додасында соңғы бәсекеде өнер көрсеткен еді.
Еске сала кетейік, бұдан бұрын Елена Рыбакинаның Лондон турнирінің жартылай финалынан тыс қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).