АСТАНА. KAZINFORM — Қазақстанның жұптық сындағы бірінші, әлемнің 48-ракеткасы Анна Данилина Яссы (Румыния) WTA 250 турнирінің финалына шықты.
Жарыстың 1-ракеткалары А.Данилина – ресейлік Ирина Хромачева жұбы жартылай финалда италиялық Анджелика Морателли – америкалық Сабрина Сантамариямен сынға түсті.
Қазақстандық-ресейлік дуэт қарсыластарын 6:2, 6:4 есебімен тізе бүктірді. Бір сағат 15 минутқа созылған матчта екеуі 3 эйспен бірге 12 брейк-пойнттың төртеуін пайдаланды. Морателли – Сантамария 3 брейк-пойнттың біреуін ғана өз есептеріне жазды.
Анна Данилина – Ирина Хромачева финалда доданың 2-ракеткалары, ресейліктер Александра Панова – Яна Сизиковамен чемпиондық атақты сарапқа салады.
Соңғы бәсеке 26 шілдеге белгіленген.
Еске сала кетейік, бұдан бұрын Сандуғаш Кенжебаеваның Астана жарысының ширек финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).