АСТАНА. ҚазАқпарат – Қазақстанның жұптық сындағы бірінші, әлемнің 25-ракеткасы Анна Данилина Гамбург (Германия) WTA 250 турнирінің финалына шықты, деп хабарлайды ҚазАқпарат тілшісі.
Жарыстың 1-ракеткасы болып тіркелген қазақстандық теннисші ресейлік Александра Пановамен бірге жартылай финалда италиялықтар Ангелика Морателли – Камилла Розателломен бақ сынасты.
Бірінші партияда италиялық жұп сәтті ойнады – 6:3.
Екінші сетте тай-брейкте қазақстандық-ресейлік дуэт есе қайырды – 7:6 (7:5). Содан кейін супер тай-брейкте жеңісті жұлып алды – 10:3.
Екі сағатқа жуық уақытқа созылған бәсеке барысында Анна мен Александра 12 брейк-пойнттың тек үшеуін пайдаланды. Қарсыластары 3 эйс, 4 брейкпен (6 брейк-пойнт) көзге түсті.
Анна Данилина – Александра Панова финалда доданың 2-ракеткалары, чехиялық Мириам Колодзиэева – америкалық Анжела Куликовамен бас жүлдені сарапқа салады.
Еске сала кетейік, бұдан бұрын Александр Недовесовтің Хорватиядағы жарыстың ширек финалына шыққанын жазған болатынбыз.
Сондай-ақ Бейбіт Жұқаев Эквадордағы турнирдің ширек финалына өтті.
Президент кубогында Денис Евсеев ширек финалға шыққандар қатарына қосылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).