Апатқа ұшыраған AZAL ұшағы екі ай бұрын техникалық тексеруден өткен

АҚТАУ. KAZINFORM – Ақтау маңында апатқа ұшыраған ұшақ биылғы қазан айында толық техникалық тексеруден өткен. Бұл туралы AZAL компаниясы АзерТАДЖ агенттігінің сауалына жауап берген.

AZAL әуе компаниясына тиесілі «Embraer 190» әуе кемесі 2013 жылы шығарылған және 4K-AZ65 нөмірімен тіркелген. 

Хабарламада былай делінген: «Өндірушінің сериялық нөмірі: 19000630. Ұшақтың жалпы ұшу уақыты – 15 257,22 сағат және 9 949 рет жерге қонған. Әуе кемесінің соңғы толық техникалық тексерісі 2024 жылдың 18 қазанында жүргізілді. Соңғы тексерістен бері 671 ұшу сағатын өткізген. 

Ал әуе кемесінің капитаны Игорь Кшнякин – мол тәжірибелі маман, ол 15 мың сағаттан астам уақыт әуеде ұшқан және 11 200 сағатында капитан лауазымында болған.

Бұған дейін хабарланғандай, Қанат Бозымбаев AZAL ұшағындағы шұрық-тесіктер туралы сұраққа жауап берді.