АСТАНА. KAZINFORM – Қазақстанда жалғыз баспанасы апатты деп танылған азаматтарға тұрғын үй бөлуге қатысты өзгеріс енгізілді. Енді жергілікті бюджет есебінен салынған немесе сатып алынған баспананы оларға бөлу мәселесін әкімдіктер қарайды. Бұл туралы ОКҚ өткен баспасөз мәжілісінде ҚР Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков мәлімдеді.
Бұған дейін жалғыз баспанасы апатты деп танылған азаматтарды баспанамен қамту ісі «Отбасы банкі» арқылы жүргізілетін.
– Енді жергілікті бюджет есебінен салынған немесе сатып алынған тұрғын үйлерді мұндай азаматтарға бөлу құзыреті әкімдіктерге қайтарылды. Баспананы бөлу туралы шешім комиссия арқылы қабылданады, - деді спикер.
Айта кетейік, 2025 жылдың мамырынан бастап тұрғын үйге мұқтаж азаматтарды есепке алу және баспана бөлу қызметтері әкімдіктерден «Отбасы банкіне» берілген. Ал әкімдіктер коммуналдық тұрғын үй салу немесе сатып алу және азаматтарды қоныстандыру жұмыстарын атқарумен шектелген еді.
Еске салайық, бұған дейін апатты тұрғын үйлерді реновациялауға жаңа кепілдік тетігі енгізілгені хабарланды.
Алпамыс Файзолла
Әл-Фараби атындағы ҚазҰУ журналистика факультетінің түлегі. Л.Н. Гумилев атындағы ЕҰУ-де қазақ тілі мен әдебиеті бойынша магистратураны бітірген. Сондай-ақ, Ұлыбританиядағы Абердин университетінде магистратурада оқыған. Республикалық телеарналарда қызмет атқарған. 2026 жылдан бастап «ҚазАқпарат» халықаралық ақпарат агенттігінің тілшісі.