Аптап ыстық Германияға жетті

АСТАНА. KAZINFORM – Франция, Испания және Ұлыбританияны шарпыған аптап ыстық Германияға жетті. Синоптиктердің болжамынша, шілденің 2-сі күні температура шарықтау шегіне жетіп, Германияның оңтүстігінде 40°C шамасында, ал елдің басқа өңірлерінде 35°C және одан жоғары болады, деп хабарлайды DW.

Еуропадағы аномальді ыстық – «жаңа қалып»

Испания мен Португалия шекарасындағы Эль-Гранадо қаласында 30 маусымда ауа температурасы +46°C-қа дейін көтерілді. Бұл – Испаниядағы жаздың алғашқы айына тіркелген ең жоғары көрсеткіш. Елдің бірнеше аймағында дабылдың қызыл деңгейі жарияланды.

Осы рекордтық ыстық аясында Севилья қаласында БҰҰ-ның даму қаржыландыруы жөніндегі конференциясы өтті. Оған БҰҰ Бас хатшысы Антониу Гутерриш те қатысты.

– Аптап ыстық енді сирек құбылыс емес – ол жаңа қалыпқа айналды. Жер шары барған сайын ысып, қауіпті болып барады – бұл қатерден ешбір ел сақтандырылмаған, – деп жазды ол Х платформасында.

Гутерриш климаттың өзгеруіне қарсы батыл әрекетке шақырды.

Францияда 400 гектар орман өртенді

Жерорта теңізінің оңтүстік-батыс жағалауындағы Окситания аймағында қатты ыстықтың салдарынан шыққан орман өрті 400 гектар аумақты күлге айналдырды. 1 шілде, сейсенбі күні Парижде және тағы 15 департаментте аптап ыстыққа байланысты дабылдың қызыл деңгейі жарияланады.

Францияның энергетикалық ауысым министрі Аньес Панье-Рюнаше елдегі ауа райын «көз көріп, құлақ естімеген құбылыс» деп атады.

Ең ыстық Уимблдон

30 маусым күні Лондонда +30°C шамасындағы ыстықта әйгілі Үлкен дулыға теннис турнирі – Уимблдон басталды. Бұл – жарыс тарихындағы ең ыстық алғашқы күн ретінде тіркелді.

Бұған дейін әлемдегі ең құрғақ шөлге қар түскенін жаздық.