Аптап пен аязда пана болар кемпингтер жеткілікті ме
АҚТӨБЕ. KAZINFORM — Ақтөбе аумағындағы жолда байланыс нашар. Қазір бұл негізгі проблема болып тұр. Ал жол бойындағы сервиске әлі де болса жұмысшы мамандар қажет. Kazinform тілшісі жол бойындағы қызмет жайын білді.
Жүргізушінің сұранысы, кемпинг иесінің ұсынысы
Ақтөбе-Атырау тасжолы арқылы тәулігіне — 8 мың, Самара-Шымкент тасжолы арқылы тәулігіне — 12-15 мың көлік жүреді. Бұл — екі ғана бағыттың ағыны. Оған облыстық маңызы бар тасжолдарды да қосуға болады.
Қазір ауданаралық автобустар, такси қызметі осы жолдарда жолаушылардың талап-тілегіне орай бірнеше кемпингке аялдайды. Көбі тамақ ішеді, қажет кезде тазалық бөлмесінің қызметін қолданады.
— Ел ішінде такси қызметін атқарамын. Біз үшін бірінші кезекте жолдың жақсы болғаны керек. Ақтөбе облысы аумағында ой-шұңқыр көп. Сонымен бірге еліміз бойынша жолдарда байланыс нашар. Көп жерде мүлгіген тыныштық орнаған. Ал кемпинг қызметіне келер болсам, өзім көп аса қолданбаймын. Кейде аялдаған кезде көргенімді айтар болсам, сағат 23:00–ден кейін ыстық тамақ таппайсыз. Ас ішер жер жоқ, дүкен жабық. Ал кемпингтер тек жатар орын ұсынады. Сондықтан түнде жол жүргенде кешкі астың қамын алдын ала ойлап, жоспарлаған дұрыс, — деді жүргізуші Сырым Есенжанов.
Самара-Шымкент, Қостанай-Қарабұтақ тасжолы бойындағы Қарабұтақ ауылдық округінде 10 кемпинг орналасқан.
Әсіресе Қарабұтақ ауылында жыл сайын жаңа нысан салынып жатыр. Әрі Ақтөбе-Қарабұтақ-Ұлғайсын тасжолының құрылысы басталғалы бері жер телімін сұраушылар саны артқан.
Ал жер болса аукцион арқылы беріледі.
— Қазіргі кезде мораторий жарияланды. Себебі Ақтөбе-Қарабұтақ-Ұлғайсын тасжолы 4 жолақты болып кеңейтіледі. Оның жобалық-сметалық құжаты бектілгеннен кейін ғана жер телімін бөлу қайта жанданады. Қазіргі кезде ауылдық округке қарасты Белқопа ауылында — 2, Жарөткелде — 2, Қарабұрақта — 6 кемпинг жұмыс істеп тұр. А санатты кемпинг — біреу. Кейбір кемпингтер қызмет көрсету аясын кеңейтіп, монша да салып жатыр. Жол бойындағы бизнесті дамытып отырған кәсіпкерлер жұмысшы жетіспейтінін айтады. Бірі жоғары білікті аспазды өзге облыстан әкеліп отыр. Олар вахталық әдіспен жұмыс істейді. Қазірдің өзінде күзетші, еден жуушы, ыдыс жуушы секілді бос орындар бар. Мұнда көлік ағыны көп. Бейресми ақпаратқа сүйенсек, тәулігіне 13-15 мың машина өтеді, — деді Қарабұтақ ауылдық округінің әкімі Кеңшілік Байдрахманов.
Оның айтуынша, жол бойындағы қызмет кейінгі 10 жылда дами бастады. Сол кезде бастап жерге сұраныс артты.
— Кәсіпкерлерден кәріз-сорғы жүйесін орталықтандыруға ұсыныс болды. Қазіргі кезде жоба дайындалып, биыл іске асыру жоспарланып отыр. Жоба бойынша үш қазандықтан тұрады. Ағынды су біріншісіне түсіп, екіншісіне сүзгіден өтіп жіберіледі. Ал үшіншісінде су буға айналады. Ал бұған дейін ауыл тұрғандарымен орталық келісімге келіп, арнайы орын қазылып, төгілді, — деді Кеңшілік Байдрахманов.
Кемпингтің төрт категориясы бар
Елімізде кемпинг 5 санат бойынша салынады. Олар: А, B, C, D, Е. Әр санаттың өз артықтышығы бар, қызмет түрі өзге.
А санаты — тәулігіне 7 мың көлікке қызмет көрсете алатын орын. Мұнда жанар-жағармай құю орны, кем дегенде 25 орынға шақталған қонақүй, дәретхана мен жуыну бөлмесі, дүкені болуы керек. Сонымен бірге тамақтану орны бір мезетте кемінде 40 адам қабылдауы тиіс.
Көлікке техникалық қызмет көрсету, көлік жуу, автобус, жеңіл көлік пен жүк көліктерін бөлек орналастыратын тұрақ, күзет пен алғашқы медициналық көмек көрсету орны қарастырылады.
Адамдар бос уақытты тиімді өткізеді және демалыс аймағы да қарастырылады. Қоғамдық жуыну орны мен ғимарат ішінде, жылы жерде әжетхана болуы міндетті.
В санаты — тәулігіне мың көлікке қызмет көрсетеді. Мұнда жанар-жағармай құю стансасының болуы міндетті емес. Сонымен бірге кемпингтегі жатын орын 10-нан кем болмайды. Өзге қызметтің бәрі А санатына ұқсас келеді.
С, D және Е санатты жол бойындағы сервисте тәулігіне 100-ден астам көлікке қызмет көрсетуге жарамды. Бәріне ортақ ереже бойынша дүкен болуы тиіс. Тек үшеуінде де алғашқы медициналық көмек көрсету орны, бос уақытты өткізуге арналған демалыс аймағы, күзет қызметі, көлік жуу орны, көлікке техникалық қызмет көрсету орталығы, қоғамдық душ болмайды.
С санатында ғана тамақтану орны қарастырылған. Жатын орын ұсыну да міндетті емес.
Кәсіпкерлік басқармасының мәліметінше, «А», «В», «С» және «D» санатты жол бойындағы сервис объектілері қолайсыз ауа райы жағдайлары кезеңінде жылыну пункттері ретінде пайдаланылады.
Қазіргі таңда Ақтөбе облысында жол бойындағы бизнес қарқынды дамып жатыр және Ақтөбе облысында жол бойындағы сервистің 118 нысаны жұмыс істейді.
Оның ішінде:
- A санатты — 5 нысан немесе 5%;
- В санаты — 4 нысан немесе 4%;
- С санаты — 61 нысан немесе 60%;
- D санатты — 48 нысан немесе ұлттық стандартқа сәйкес келетін 45%.
— Сонымен бірге қазіргі таңда кейбір аудандарда жол бойындағы сервис құрылысы басталды. Темір, Қарғалы аудандарында жанар-жағармай, автогаз құю стансалары салынып жатыр. Ал Ақтөбе-Астрахань тас жолы бойында кемпинг құрылысына 3 жер телімі берілді. Алға ауданында дәмхана, демалыс орны мен жанар-жағармай құю стансасының құрылысы биыл аяқталады. Қазіргі таңда жолаушылар мен жүргізушілер тарапынан шағым түскен жоқ, жағдай бірқалыпты. Бұл көрсетіліп отырған қызметтің сапасы, қауіпсіздік талаптарының орындалуы сынды негізгі көрсеткіштердің талапқа сай екенін көрсетеді. Жолаушылардың да, жүргізушілердің де тілектері мен ұсыныстары уақытылы ескеріліп, тиісті деңгейде қарастырылып отыр, — деді Ақтөбе облыстық кәсіпкерлік басқармасының басшысы Алмас Салықбаев.
Жол бойындағы байланыс
Жол-көлік апаты, боранды күні ең маңыздысы — байланыс. Бұл — адам өмірін құтқарар құрал. Дегенмен байланыс әзірге нашар. Кей жердерде мүлгіген тыныштық орнаған.
— Қазіргі таңда жол бойы мобильді байланыспен толық қамтылмаған. Оған себеп — мобильді байланыс станцияларын орнату үшін арнайы инфрақұрылым тартылмаған. Республикалық маңызы бар автожолдардың бойында үздіксіз байланыспен қамту мақсатында Ақтөбе облысының 9 ауданында АМС (автоматты планетааралық станция) орнату үшін 17 нүкте (8 жеке, 9 мемлекеттік) анықталды. Жобалау-сметалық құжаттама әзірленді, сараптама жүргізіліп жатыр. Барлығы 15 нүктеде сараптаманың оң қорытындысы алынды. Қалған 2 нүкте бойынша қорытындыны күтіп отырмыз, — деді Алмас Салықбаев.
Айта кетейік, қазіргі таңда жол бойында 32 жанар-жағармай, 8 автогаз құю станциясы бар. Ақтөбе облыстық статистика департаментінің деректеріне сүйенсек, 2025 жылдың қаңтар-маусым айларында жүк айналымы 108,7%, жолаушы айналымы 109,4% құрады. Екеуінде де өсім бар.
Еске салсақ, былтыр елімізде жол бойындағы әжетханаларды тексеру жұмыстары жүрді. Жол бойындағы 52 дәретханада санитарлық-эпидемиологиялық нормаларды өрескел бұзу фактілері анықталды.