Араб елдері Газа секторын қайта құру жоспарын дайындады
АСТАНА. KAZINFORM - Араб елдерінің сыртқы істер министрлері дүйсенбі күні Каирде Палестина халқын ешқайда көшірмей-ақ Газаны қалпына келтірудің «арабша жоспарын» пысықтау үшін дайындық отырысын өткізді, деп хабарлайды Kazinform тілшісі.
Мысыр әзірлеген жоспар сейсенбі күні Араб Лигасының кезектен тыс саммитінде араб басшыларына АҚШ президенті Дональд Трамптың анклавты «Таяу Шығыстың Ривьерасына» айналдыру және оның палестиналық тұрғындарын Мысыр мен Иорданияға көшуге мәжбүрлеу жоспарына қарсы ұсынылды.
Араб елдерінің сыртқы істер министрлері Каирде Араб Лигасының кезектен тыс саммиті қарсаңында жабық есік жағдайында кездесті, ол палестиналықтардың қоныс аударуына қарсы біртұтас араб ұстанымын және Газа секторын қалпына келтіру жоспарын шығармақшы.
Бастапқыда 2025 жылдың 27 ақпанында Каирде жоспарланған Палестина мәселесі бойынша Араб Лигасының кезектен тыс саммиті 2025 жылдың 4 наурызына шегерілді.
Жобаға сәйкес, Мысырдың жоспары ХАМАС-ты биліктен алып, оның орнына араб, мұсылман және батыс мемлекеттері бақылауындағы уақытша органдарды құруды көздейді, деп хабарлайды Reuters.
Бұл ұсыныстың 2023 жылғы 7 қазандағы шабуылдардан туындаған соғысты тоқтататын тұрақты бітімгершілік келісімі жасалғанға дейін немесе кейін орындалатыны белгісіз.
Мысырдың жоспары бойынша, басқаруға көмек көрсету миссиясы Газа секторындағы ХАМАС үкіметін белгісіз мерзімге ауыстырады және гуманитарлық көмек пен соғыстан қираған анклавты қалпына келтіруге жауапты болады.
Мысырдың ұсынысы бойынша бұл процесс үш жылдан бес жылға дейін созылады. Алғашқы кезеңде секторда гуманитарлық аймақтар құрылады: онда палестиналықтардың Израиль бомбалауы нәтижесінде қираған үйлері қалпына келтірілгенге дейін шатырлар мен тіркемелер орнатылады.
Мысырлық ақпарат құралдарының хабарлауынша, Парсы шығанағы елдерінің, Мысыр мен Иорданияның басшылары 21 ақпанда Эр-Риядта өткен бейресми кездесуде шамамен 53 миллиард долларды құрайтын жобаның құны туралы келіскен. Палестина анклавын қалпына келтіруді қай елдер және қандай пропорцияда қаржыландыратыны туралы ақпарат әзірге берілген жоқ.
Өткен сенбіде Мысыр Сыртқы істер министрі Бадр Абделльатти оның елі қайта құру жоспары аясында Газа секторына орналастырылатын палестиналық полиция күшін дайындайтынын айтты.
Сонымен қатар, Абделльатти Газа секторындағы қауіпсіздік және басқару мәселелері бойынша Мысырдың Палестина билігімен өзара түсіністік танытқанын атап өтті.
Бұған дейін Израильдің Газа секторына гуманитарлық көмектің өтуін тоқтатқаны туралы хабарлаған едік.
Сондай-ақ Израиль ХАМАС-қа қысымды күшейту үшін палестиналықтарды солтүстік анклавтан көшіруді жоспарлап отырғаны айтылды.