Араб елдерінде ортақ виза жүйесі іске қосылады

АСТАНА. 21 желтоқсан. ҚазАқпарат - Парсы шығанағындағы Ислам ынтымақтастық ұйымына мүше елдер үшін бірыңғай виза 2014 жылдың орта шенінде пайда болады. Қазіргі уақытта араб «алтылығының» ішкі істер министрлігі деңгейінде бірыңғай визалық кеңістік құру жөніндегі техникалық ереженің жай-жапсары талқыланып жатыр.

Еуропалық «шенген аймағына» ұқсас аталмыш визалық жүйеде «алтылықтың» құрамына кіретін елдердің бірінің елшілігі берген виза бойынша осы аталған елдердің бәрінде еркін жүріп-тұра аласыз. Яғни, осы жүйе бойынша қолыңызға тиген виза Сауд Арабиясында, Кувейтте, Бахрейнде, Катарда және Оманда жарамды болады.

Эр-Риядтың сауда-өнеркәсіп палатасының президенті Әбдірахман әз-Замиляның сөзіне қарағанда, мұндай қадам осы аймақта жұмыс істейтін шетелдіктердің және жылдан жылға қатары артып келе жатқан туристердің еркін жүріп-тұруына көмектеседі.

Белгілі болғандай, Парсы шығанағы елдерінде шетелдіктердің қарасы едәуір. Санмен өрнектегенде, шетелдіктердің қарасы аймақ тұрғындарының 31 пайызын құрайды екен. Шетелдіктердің дені Сауд Арабиясында нәпақасын айырып жүр - 9 млн адам. Десе де, техникалық-бюрократиялық кедергілерге байланысты осы аймақтағы мемлекеттердің шекарасынан өтудің өзі қиындықтарға толы екенін қаперлеріңізге сала кеткіміз келеді.

Парсы шығанағындағы елдерде визалық режим әрқилы болып келеді. Мәселен, Біріккен Араб Әмірліктері, Бахрейн, Катар және Оман Шенген аймағының 26 елінен және АҚШ, Ұлыбритания, Жапония, Оңтүстік Корея, Малайзиядан келген азаматтардан ел аумағына енуге рұқсат беретін визаны талап етпейді. Ал Сауд Арабиясы мен Кувейт көптеген елдердің азаматтарынан ел аумағына енгуге рұқсат беретін визаны талап етеді, деп хабарлады muslim.kz.