Арал ауданында әкімдер халық алдында есеп беріп болды - Қызылорда облысы
Ауданда барлық деңгейдегі әкімдер жылдағы дәстүр бойынша есеп берулерін аяқтады. Бұл жиналыстарда жергілікті билік өкілдері биылғы мерекелі жылғы атқарылған жұмыстарды баяндап, алда тұрған негізгі міндеттердің жайын айтып берді. Мәселен, Сапақ ауылдық округінің әкімі Кенжебек Жанназаров соңғы жылдары ауыл өмірінде елеуді өзгерістердің орын алғанын тілге тиек етті. Аудан орталығынан 25 шақырым қашықтықта орналасқан елді мекенде тұрғындардың тұрмыс жағдайы айтарлықтай жақсарды. Ауылда кейінгі кездері ауылдық әкімдік пен медициналық бекет ғимараттары салынып, пайдалануға берілді. Кітапхана тұрақты жұмыс істеп тұр.
Мергенсай ауылдық округіне Мергенсай және Тастүбек ауылдары қарайды. Округте 27 Батыр Ана тұрады. Екі ауылда 7 азамат кәсіпкерлікке ден қойып, жеке балық аулау кәсібімен айналысады. Соңғы кездері ауылдарда байланыс жүйесі тұрақты жұмыс жасай бастады. Жақында Тастүбек ауылына электр жарығы жүргізілді. Жақын аралықта медициналық бекет құрылысы басталмақшы. Ауыл тұрғындары осының бәріне қанағаттанғандық білдірді.