Арғын Нығматулин 12 жылға бас бостандығынан айырылуы мүмкін

АСТАНА. KAZINFORM - Прокуратура органдарының бастама жасауымен Сыбайлас жемқорлыққа қарсы іс-қимыл агенттігі іздеу жариялаған Арғын Нығматулиннің үстінен қандай бап бойынша іс қозғалғаны мәлім болды.

Бұл туралы Kazinform ҚР Бас прокуратурасының баспасөз қызметіне сілтеме жасап хабарлайды.

«ҚР Бас прокуратурасы А.Нығматулинге және басқа да күдікті тұлғаларға қатысты Қылмыстық кодекстің 189-бабы (Сенiп тапсырылған бөтен мүлiктi иемденiп алу немесе талан-таражға салу) 4-бөлігі 2-тармағы бойынша тергеу жүргізіп жатыр», - делінген хабарламада.

Бұл бап бойынша, жеті жылдан он екі жылға дейін бас бостандығынан айыру жазасы қарастырылған.

Бұған дейін еліміздің прокуратура органдары бұрынғы Мәжіліс спикері Нұрлан Нығматулиннің ағасы Арғын Нығматулинге іздеу жариялағанын жазған едік.

Кейінірек Арғын Нығматулинге халықаралық іздеу жарияланғаны мәлім болды.