АСТАНА. KAZINFORM - Шайбалы хоккейден Қазақстан чемпионаты плей-офф сатысының финалдық кезеңі басталды.
Жарыстың аталған сатысында көкшетаулық «Арлан» мен өскемендік «Торпедо» командалары бақ сынайды.
Алғашқы матчта көкшетаулық команда ойын тізгінін өз қолында ұстады. Нәтижесінде алғашқы екі кезеңде қарсылас қақпасына жауапсыз алты гол соғып үлгерді. Шешуші үшінші кезеңде тағы үш гол енгізіп, өз қақпасына екі шайба жіберіп алды.
Осылайша «Арлан» алғашқы матчта қарсыласынан 9:2 есебімен басым түсіп, бас жүлдеге қол созуға жақындай түсті.
Енді алдағы ойын 9 сәуірде Өскеменде өткізіледі.
Одан кейінгі ойындар 13 және 15 сәуір күндеріне жоспарланған. Жеңімпаз бір команданың төрт жеңісінен кейін анықталады.
Айта кетсек, бұдан бұрын жартылай финалда «Арлан» қарағандылық «Сарыарқаны», «Торпедо» өзбекстандық «Хумо» командасын қапы қалдырды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.