ЕРЕВАН. KAZINFORM – Армения үкіметі «Халықаралық бейбітшілік пен өркендеу жолындағы Трамп бағыты» (TRIPP) жобасының негіздемелік келісімін ратификациялау жөніндегі заң жобасын Ұлттық жиналыстың қарауына енгізді, деп хабарлайды Kazinform агенттігінің Еревандағы меншікті тілшісі.
Парламенттің ресми сайтында жарияланған мәліметке сәйкес, осы аптада депутаттар құжатты талқылауға кіріседі. Ұлттық жиналыста қаралатын заң жобасын Арменияның Сыртқы істер және халықаралық сауда министрі Арарат Мирзоян таныстырмақ.
Еске салайық, АҚШ пен Армения тараптары бұл келісімге биыл 1 маусымда Вашингтонда және 4 маусымда Ереванда қол қойған. Ал 16 шілдеде үкімет оны ратификациялау туралы заңнамалық бастаманы мақұлдады.
Таяуда аталған елдің премьер-министрі Никол Пашинян TRIPP жобасы Армения экономикасына тың серпін беретінін мәлімдеді.
Бұған дейін хабарлағанымыздай, Армения мен АҚШ TRIPP жобасы аясында бірлескен компания құруға ниет білдірді.
Әлихан Асқар
2018 жылы А. Байтұрсынов атындағы Қостанай мемлекеттік университетін журналистика мамандығы бойынша тәмамдаған. Әр жылдары облыстық Qostanai, республикалық Astana TV, «Жетінші арна» телеарналарындағы бағдарлама және жаңалықтар бөлімінде қызмет етті. «ҚР Президенті телерадиокешенінде» 2022 жылдың мамырынан бастап еңбек етеді. 2023 жылдан бері Kazinform агенттігінің Өзбекстандағы меншікті тілшісі.