АСТАНА. KAZINFORM — Қазақстандық теннисші, дүниежүзілік рейтингіде 958-орында тұрған 20 жастағы Аружан Сағындықова Луань (Қытай) ITF W15 турнирінің финалына шықты.
Аружан жарыс барысында төрт кездесу өткізіп, соның бәрінде жеңіске жетті.
Сағындықова жартылай финалда рейтингіде 1 059-орында тұрған, 20 жастағы қытайлық теннисші Янань Хоуды қапы қалдырды.
Бірінші партияда корт иесі бет қаратпады – 6:0. Бұдан кейін Аружан камбэк жасап, екі сетті өз есебіне жазды – 6:3, 6:2.
Қазақстандық теннисші финалда әлемнің 797, осы доданың 5-ракеткасы, 19 жастағы ресейлік спортшы Мария Калякинамен чемпиондық атақты сарапқа салады.
Аружан Сағындықова жұптық сында Асылжан Арыстанбековамен бірге жартылай финалға дейін жетті.
Еске сала кетейік, бұдан бұрын АҚШ ашық чемпионатында Заңғар Нұрланұлының әлемнің 1-ракеткасына жол бергенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).