АСТАНА. KAZINFORM — Қазақстандық теннисші, әлемнің 765-ракеткасы, 21 жастағы Аружан Сағындықова Шарм-эш-Шейх (Мысыр) ITF W35 турнирінде екі жеңіске қол жеткізді.
Қазақстандық теннисші алдымен рейтингіде 1 425-орындағы ресейлік Аглая Федорованы 6:0, 0:6, 6:4 есебімен жолдан тайдырды.
Аружанның екінші айналымдағы қарсыласы әлдеқайда азулы болды. Бұл жолы ол әлемнің 386-ыншы, осы жарыстың 4-ракеткасы, үндістандық Сахая Ямалапаллиге тап келді.
Екі сағат 8 минутқа созылған тартысты бәсекеде А.Сағындықова 6:4, 7:6 (7:4) есебімен басымдылық танытты.
Аружан Сағындықова жартылай финалға шығу үшін әлемнің 405-ракеткасы, мысырлық Абдель Азиз Ламис Альхуссейнмен таласады.
Қазақстандық теннисші жұптық сында ресейлік Мария Головинамен бірге алғашқы айналымда италиялықтар Федерика Сакко – Камилла Занолиниге жол берді – 6:3, 3:6, 7:10.
Еске сала кетейік, бұдан бұрын Тимофей Скатовтың Шымкент турнирінің финалына шығу үшін таласатынын жазған болатынбыз.
Сондай-ақ Денис Евсеев жұптық сында Шымкент турнирінің жартылай финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).