Депутат өзінің сауалында 2009 жылы наурыздың 20-сында Оңтүстік Қазақстан облысы Арыс қаласының маңындағы әскери гарнизонда «Қазарсенал» мекемесінің оқ-дәрі қоймасында жарылыс болып, бес адам қаза тапқанын, оншақты адам жараланғанын еске салды. Осы мәселе төңірегінде Арыс қалалық мәслихат депутаттары алаңдаушылық танытып, хат та жолдаған екен.
«Ол хатта: «Арыс қаласының маңындағы жарылыстан кейін Арыс қалалық мәслихатының кезектен тыс сессиясында «Қазарсенал» ЖШС мекемесінің басшылары шақырылып қала тұрғындарының талаптарына сәйкес, олардың қауіпсіздігін сақтау мақсатында, оқ-дәрілерді залалсыздандыру орнын қаладан тыс жерге көшіру туралы ұсыныс-талап қойылған болатын. Бұл туралы бұқаралық ақпарат құралдары да бірнеше рет мәселе көтерді. Алайда, осы күнге дейін аталған мекеме көшірілген жоқ, керісінше жұмысын жандандыра түсуде. Осы мәселенің оң шешілгені игі» - деп көрсетілген. Осыған байланысты Үкімет басшысынан Оңтүстік Қазақстан облысы Арыс қаласы тұрғындарының қауіпсіздігін сақтау мақсатында «Қазарсенал» ЖШС-нің оқ-дәрілерді залалсыздандыру орнын қаладан тыс жерге көшіруге ықпал етуін сұраймын», деді сенатор.