ОРАЛ. ҚазАқпарат - Батыс Қазақстан облысында Сомалиден келген тамада ұсталды, деп хабарлайды ҚазАқпарат тілшісі.
БҚО полиция департаменті баспасөз қызметінен түскен мәліметке қарағанда, 25 жастағы шетелдік Ақтөбеден Орал қаласына барар жолда, Сырым ауданында қолға түскен. Шетелдік азамат Алматы қаласындағы жоғары оқу орындарының бірінің студенті болып шықты. Оның айтуынша, Қазақстанда 2019 жылдан бері тұрады. Алматыдағы ЖОО-да бағдарламашы мамандығы бойынша оқиды.
«Осы уақыт ішінде сомалилік жігіт тілді жақсы меңгеріп, салтанатты іс-шараларға қатысып, ақша тауып жүрген. Оның визасының уақыты біткен, соның негізінде ҚР Көші-қон заңнамасын бұзу дерегі бойынша хаттама жасалды. Материал сотқа жіберілді. Енді шетелдік азамат депортациялануы мүмкін», - деп хабарлады ведомстводан.
Еске сала кетейік, бұдан бұрын Оралда пара алды деп айыпталған полиция шенеунігінің 5 жылға сотталғанын жазған болатынбыз.
Сондай-ақ, Оралда әйелді тонаған ер адам видеоға түсіп қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).