Асхат Жіткеев енді Қазақстан дзюдо федерациясының вице-президенті қызметін атқарады

АСТАНА. KAZINFORM - Бұл шешім федерацияның Астанада өткен кезекті конференциясында қабылданды.

Асхат Расулұлы Жіткеев 2008 жылы Бейжің Олимпиадасының күміс жүлдесін еншіледі. Сондай-ақ Азия чемпионы, оған дейін әлем чемпионатының қола жүлдегері атанды. 

2011–2012 жылдары ерлер ұлттық құрамасының бас бапкері қызметін атқарды. 2012-2021 жылдарда федерацияның даму жөніндегі директоры, бас хатшысы болса, 2021-2022 жылдары федерация президентінің міндетін атқарды. Ал 2023 жылдан бастап қайтадан бас хатшы лауазымында еңбек етті. 

Соңғы екі жылдан бері Асхат Жіткеев Азия дзюдо одағының рефери-директоры ретінде халықаралық деңгейде қызметін жалғастырып келеді.

Қазақстан дзюдо федерациясының бас хатшысы қызметін енді халықаралық дәрежедегі спорт шебері, 2012 жылғы Лондон Олимпиадасының қатысушысы, бірнеше дүркін ел чемпионы Тимур Болат тағайындалды. Тәжірибелі маман 2017 жылдан бері Қазақстан ұлттық құрамасының команда жетекшісі қызметін атқарып келді.

Конференция барысында өңірлерде дзюдо спортын өркендетуге қатысты нақты тапсырмалар берілді. 2028 жылы Лос-Анджелес Олимпиада ойындарында ұлттық құраманың табысты ойын көрсетуіне бағытталған жұмыс жалғасады.

Еске салсақ, бұдан бұрын Моңғолияда өтіп жатқан Grand Slam сериясындағы халықаралық турнирдің алғашқы күнінде Қазақстан құрамасы ешқандай медаль ала алмады.